ГУНИГ

 Зээгэн цагаан үүлс  
                          салхинд эрхэлж өнжсөн

Зээрэн гүйдэлт салхин

энгэрийн цэцгэнд хоргодсон

Зэвэргэн хүйтэн бороо

үес үесхэн норгосон

Зэгэл саарал гуниг

сэтгэлд хургаж сэмэрсэн

Давс хүртэл сулхан мэдрэгдээд,

амталмааргүй

Дарс хүртэл амтгүй санагдаад,

уумааргүй

Дуу хүртэл хөггүй сонсогдоод,

чагнамааргүй

Дурлал хүртэл өнгөгүй бодогдоод,

догдолмооргүй

          ******************

Сэлүүхэн талд ганц зээр цахилах,

зэрэглээ мэт

Сэвэлзүүр салхинд хэнз ногоо жихүүцэх,

хясал мэт

Сэтгэлийн гүнд жаахан гуниг хөврөх,

нулимс мэт

Сэрүүн зүүдэнд хааяа чи ирэх,

учрал мэт

Зэрэглээт сэрмүүн талаар

зээр мэт цахилмаар

Зэвэргэн хүйтэн салхийг сөрж

хэсэг алхалмаар

Зэрвэс гунигийг үргээж,

төөрсөн тавиланг аргадмаар

Зэлгээн цагаан хүслээр,

насандаа мартамгүй дурламаар