НАМРЫН ШҮЛЭГ

НАМАР ЦАГ

Будант төгөл

Шаргал навчис

Хоосон сандал

Хосууд зугаалахыг хүлээсэн ...

Бороо хүртэл

орох уу, болих уу гэж тээнэглэзээд л

Борог өвс газартаа шурган

чимээгүй мэгшээд л

Хэдхэн навчис мөчиртөө хоргодон амьдралд тэмүүлээд л

Хэзээ ч дуусахгүй юм шиг, ийм бүүдгэр үдэш

Хэн ч дурсахгүй юм шиг, тийм гэгэлгэн оройг

Салхи хүртэл

хийсэх үү, байх уу гэж сэвшээд л

Сарны гэгээ усанд тунаран

сэмхэн бүжиглээд л

Зөрөг цэцгийн үнэрт ялигүй жаахан тайтгараад л 

Зүүдлээд сэрэхгүй юм шиг, ийм амгалан шөнө 

Зөрөөд учрахгүй юм шиг, тийм уужим хорвоод

Үүлс хүртэл

нүүх үү, байх уу гэж сэмрээд л

Үсэнд буусан сор

зэрвэс хааяа гялтганаад л

Намуухан дуу сэтгэлд амилж эгшиглээд л 

Намар болохгүй юм шиг, энэ яваа насанд 

Намайг олохгүй юм шиг, тэр сайхан хайр

2005.10.08