ТАНИХГҮЙ ЖИМЭЭР

Үүлс болоод эрх дураараа 
                  тэртээд хөвж сарних сан
Үгүй эсвэл салхи болж
                  уйтгараа марттал хийсэх сэн
Үүрийн зүүдэнд учирсан
                  тэнгэрийн ханхүү чамтай
Үлгэр төгсөх шиг жаргалтай
                  ганцхан шөнийг өнгөрөөх сөн
Уулс болоод өнө мөнхөд
                  амгалан тайван налайх сан
Урсгал дөлгөөн мөрөн болж
                  олны цангааг тайлах сан
Угаас хиргүй сэтгэлийн
                  шаналал бүхнийг орхиод
Ухаан суусан амьдралд
                  ганцхан удаа дурлах сан

2003.03.16