Эрдүү цээлхэн хоолойд чинь
үүл нар ивэлж
Эгшиг дутуу хорвоогийн
үйлийн үрийг аргадах юм
Элээх тавилангийн зураас
санаандгүй шүргээд өнгөрсөн
Эгшин төдий учрал
дуунд шингэн үлдэж дээ
Уужуу тунгалаг хоолойд чинь
уул ус баясаж
Уйтгар дэндүү амьдралын
цөхрөл гунигийг зөөллөх юм
Угтан тосох өдрүүдэд
гэгээ болон сүүмэгнэх
Учралд яараагүй цагийн
дурсамж хуучран элэгдэж дээ
Аядуу намуухан хоолойд чинь
од сар эрхэлж
Аялгуу гундуу орчлонгийн
гэрэл гэгээг тэтгэх юм
Аргаар болохгүй амьдралын
сүүдэр үргээж хөврөх
Амгалан тунарсан мөрөөдөл
хүслээс алдууран холдож дээ
No comments:
Post a Comment